Vuschs per l'ex18

Il president communal Disentis/Mustér davart l'ex18

Robert Cajacob, president communal Mustér

Preziadas exposituras e preziai expositurs

Stimadas convischinas e stimai convischins da Mustér e dalla regiun Surselva

L'exposiziun da commerci e professiun a Mustér s'auda tier ils impurtonts arranschaments che serepetan mintga quater onns sco p.ex. ils giugs olimpics ni il campiunadi da ballapei. Lein nus haver in bien futur en nossas valladas ed en nos vitgs, stuein nus prender mintga caschun pusseivla da communicar anoviars tgi che nus essan, tgei che nus essan habels da prestar e tgei che nus savein porscher, seigi quei per nies diever, denton era sur ils cunfins da nossa regiun ora. Per nus indigens ei l'ex ina buna caschun da daventar puspei inaga pertscharts tgei purschidas che nus havein avon casa, tgei ch'ei niev sin fiera e tgi che stat davos nossas fatschentas.

In mument havein nus stuiu temer che l'ex18 hagi buca liug. Negin vuleva propi s'engaschar per quell'impurtonta manifestaziun. Guess, l'organisaziun dall'ex ei buca sempla, pretenda grond engaschi da temps e lavur sco era in pulit budget. En quei connex admettel in grond engraziament all'Uniun da commerci e professiun per siu engaschi ed als expositurs per lur iniziativa da separticipar all'ex18. In grond engraziament drezzel jeu cunzun allas duas curaschusas copresidentas dil comite d'organisaziun Rita Huonder-Tenner e Corinne Staub per lur promtadad da surprender il tgamun.

Tgi ei pli dependents da bunas fatschentas en nossa regiun che nusezs che vivin cheu? Fatschentas che prestan buna lavur, porschan buns products, che dattan lavur a nus e procuran aschia che nos vitgs vegnien buca depopulai.

Cun demussar interess per l'ex, cun s'engaschar per l'ex e visitar l'ex18 demussein nus simpatia e sustegn per nies commerci.

Jeu selegrel gia ussa sin las sentupadas cun expositurs e convischins a caschun dall'ex18.

Robert Cajacob, president communal Disentis/Mustér

Il president dall’UCP davart l’ex18

Edgar Durschei, president UCP Mustér

Stimadas exposituras, stimai expositurs

Preziadas visitadras, preziai visitaders

A caschun dalla davosa radunonza generala dall'uniun da commerci eprofessiun Mustér (UCP) han ils commembers decidiu da lantschar suenter 4 onns la proxima exposiziun. Igl ei reussiu als responsabels d'anflar persunas che s'engaschan el comité d'organisaziun (co).

Il co vegn per l'emprema gada tgamunaus da duas dunnas, numnadamein Rita Huonder-Tenner e Corinne Staub che san aschia reparter las lavurs da preparaziun per l'ex18 sin pliras schuialas e cheutras profitar da vastas experientschas. Jeu sundel perschuadius ch'il co ex18 prepara in'ulteriura nunemblideivla exposiziun en nossa regiun muntagnarda e giavischel ad els bien maun.

Per noss'uniun da commerci e professiun Mustér ei l'ex in punct central e cheutras ina dallas pli impurtontas occurenzas. A l'ex ha nossa glieud da fatschenta la pusseivladad da presentar lur interpresa, products, innovaziuns ed aschia plidentar in vast publicum. Denton ei l'ex era ina festivitad divertenta ed in impurtont liug da sentupada per nossa populaziun dalunsch e da maneivel.

En quei senn giavischel bia bunas ideas per las lavurs preparatoricas e bia buns inscunters avon e duront l'ex18.

Edgar Durschei, president dall'UCP Mustér